Les origines de Christophe Colomb
Sì u locu di nascita di l’omu chì scuprì l’America hà fattu cuntrastà à Genuva è Calvi, u storicu di Cagnanu, Albert Mattei, hà publicatu e so ricerche genealogiche nant’à Christophe Colomb in u libru « Les origines de Christophe Colomb » à l’edizione Anima Corsa. Hà racoltu unepochi di documenti permettendu d’arradicà l’urigine di Colomb in Capicorsu, in u paese di Cagnanu. Dice : « Eccuci in una lucalità di Terra Rossa, in Cagnanu, cù i nomi Fontana, San Cristofino è Colombaja à l’ingiru.
È tandu venerebbe naturale l’affaccata di una famiglia Fontanarossa, a casata a mamma di Colomb quand’ella era figlia. Una famiglia Colombo o un Cristoforo Colombo di Terra Rossa chì diventerà in Spagna Cristobal Colon di Terra Rubra ».
St’ipotesi ùn sguassa a Balagna perchè a famiglia Colomb hè passata pè Calvi, tappa ubligatoria di i Corsi in a corsa versu l’Indie. Albert Mattei s’hè interessatu dinù à a genealugia di u navigadore, è hà trovu in Capicorsu una ricurrenza di nomi listessi à quelli di a famiglia di Colomb. Avemu e leie trà Christophe Colomb è a famiglia capicursina Fieschi. Unu di i so membri, Bartolomeo, fubbe capitanu di a Vizcaina, una di e caravelle di u quartu viaghju versu l’Americhe. Trà Colomb è i Fieschi avemu ancu i De Mari, signori feudatari capicursini di San Culumbanu. Eccu elementi di riflessione chì u storicu porghje à i so lettori.
Ritrattu : Gérard Baldocchi
A - CM 07.05.2010 LAU